讀完 Bootcamp 做唔做到 Freelancer？

若然你身邊有一兩位 IT 朋友，可能會聽聞到佢哋除咗有正職，仲有幾份 freelances 喺手，甚至有啲全職 freelancer，生活又自由又精彩。然後，你發現有 coding bootcamp 可以令你短時間成為 Programmer，到底係咪就等於順理成章做到埋 Freelancer 呢？

簡短答案係：唔係讀完即刻就做到！

喺 bootcamp 入邊，的確會教識同學好多做 IT project 嘅技術，修讀完之後都有能力自己完成到一個 application，但要成為一個 freelancer，其實就唔係齋得技術咁簡單！尤其如果你以前並唔係做面對客人、溝通、項目管理等等嘅工作，其實仲有好多技能你要知道！

1. 首先，作為 Freelancer，最重要唔係技術，而係「客戶」同「口碑」！

可能你會話網上好多 Freelance 平台，但搵人「寫程式」呢一範可謂係呢啲平台之中最難配對嘅一範。唔同「清潔」/「會計」等標準嘅服務，「寫程式」往往涉及不同嘅 Project 複雜程度，既冇公價，亦冇工作標準。作為岩岩畢業嘅同學，未必識衡量 Project 嘅價值同價錢，「筍」嘅 jobs 未必接到，接到 jobs 都好大機會報錯價，導致得不償失，甚至爛尾。

咁邊度先有「筍」jobs？作為曾經有數年全職做 Freelancer 嘅筆者我，我可以話大部份好嘅 jobs 都係靠 referral 或口碑，而唔係靠平台。呢啲口碑或者客源，都唔係讀一個 bootcamp 就會拎得到，亦無可能靠一間 bootcamp 提供無限嘅客源，而係要靠自己一個一個 portfolio 儲返嚟。

2. 另外，就算俾你接到一單 job，其實好多畢業生未識「湊客」！

搵得 freelancer 做 project 嘅客戶，未必一定係有 technical 背景，即使畢業生有足夠嘅技術，溝通技巧都係不可或缺，萬一「湊」唔好個客，輕則搞到個客又忟又燥，個 project 做到出嚟都唔好同，重則反面收場，project 爛尾甚至有機會被要求退訂，輸曬時間又輸埋口碑！

3. 最後，你又有客，又有技術，個客又湊得開心，你亦要有「項目管理」嘅能力！

如果你睇緊呢篇文章嘅時候，仲心思思想入行，又想自學，你又可以諗下呢個想法諗咗幾耐！一日？一星期？一年？唔係每個人都能夠好好管理到自己嘅日程，如果做 freelance projects，對自我嘅紀律要求就更加高，否則拖下拖下，可能拖延過咗客戶要求嘅 deadline，或者就係一開頭預算錯誤，報錯時間俾客戶，可能用多咗時間會蝕曬 time cost，同時又令客戶失望。

有時一啲 project 比較大型，可能會搵埋另一個 programmer 夾份一齊做，咁就更加要考驗埋團隊分工、內部溝通、編寫方法、架構、合作等等嘅技巧，要學識埋解決呢啲問題，應對種種嘅挑戰，先確保專案能夠成功完成。

4. 「我真係好想做 freelancer，可以點做啊？」

如果你真係咁想做 Freelancer，而你未讀 bootcamp，乜技術都冇，咁當然可以先就讀 Tecky，先學識做 project 所需技能！💪🏻 喺筆者認識嘅畢業生之中，有唔少的確工作大約一兩年後，就開始接 freelances，甚至有畢業生變成全職 freelancer，再進一步開立公司 👏🏻

咁到底點樣由 bootcamp graduates 變成 freelancer 呢？要掌握到以上技能，筆者有以下建議：

• 功力需要磨練： 假若你只係岩岩畢業，功力其實未夠深厚，我會建議做多一年半載，感受一下現實 project 嘅難度，咁先會有把握獨力完成到 project。

• 積累客戶和經驗： 搵一啲相熟嘅朋友介紹，或者喺網上平台，喺自己允許嘅時間內，先完成一個 project。呢個 project 多數都唔賺錢、甚至會蝕錢，但會令你學識寶貴嘅 報價、湊客、管理 技巧。

• 做好個人網站： 機會係俾有機會嘅人！如果本身你冇客戶，但突然有唔太熟嘅客人想問你報價，可能揀唔揀你就在於你有冇啲個人 portfolio 展示俾人睇，所以準備你嘅個人網站，隨時大派用場！

• 黎搵我傾下計： 哈哈，其實唔單止搵我，更加可以同其他 freelancer 傾多啲，互相交流接 job 湊客嘅技巧，互相學習，話唔定仲有 job 介紹！點搵到我？留意住 Tecky Events 就會知道！

希望大家睇完呢篇文章之後，明白到做 freelancer 唔係單單靠 bootcamp 就做得到，仲有好多技巧需要訓練，可以幫到大家一步步達到理想嘅 freelancer 生活喇！